Akuersissutit aamma Pisassiissutit pillugit nalunaarut nutaaq Naalakkersuisut ulloq 15. juuni 2026 akuersissutigaat, sinerissap qanittuani aalisarnermut ajornannginnerusumik aalisarsinnaalernissaq akuersissutip qulakkeerpaa.
Allannguutinut immikkut uku maluginiaqquneqarput:
1) Sinerissap qanittuani qaleralinnut aalisarsinnaanissamut akuersissummik pissarsisinnaanermut 18-iniit 29 tikillugit ukioqarnissamik piumasaqaat peerneqarpoq.
2) Akuersissut pigisartik atorlugu pisanik tunisinermi umiatsiaararsorlutik aalisartut nammineq najuuttarnissaat pillugu piumasaqaat, CVR-mi nalunaarsorneqarsimagunik angallallu nalunaarsorneqarsimappat, atorunnaarpoq.
3) Aappaagumoortumik akuersissummik pissarsissagaanni, akuersissutip pigineqartup 1. december atorneqarsimanissaanik piumasaqaat peerneqarpoq.
4) §15-imi piumasaqaatinut tunngatillugu Qaanaami Tunumilu najugaqartunut immikkut akuersissuteqartarneq nalinginnaasumik atuutilersinneqarpoq, taamaattumillu piumasaqaatinit immikkut akuersissummik qinnuteqarnissaq pisariaqartikkunnaarpaat. Kommunimit uppernarsaat aqqutigalugu Qaanaami, nunaqarfinni kiisalu Tunumi najugaqarnertik uppernarsarsinnaagunikku akuersissummik pisinnaapput.
Taakku saniatigut iluarsiisoqarlunilu naleqqussaasoqarpoq, assersuutigalugu sinerissap qanittuani aalisarsinnaasut angallataasa angissusaa, nalunaarummi siullermi naatsorsuineq kukkusoq atorneqarsimammat. Maanna erseqqissarneqarpoq angallatit sumiiffinni tamani 24 meter tikillugit takissuseqarsinnaasut, taamaalilluni angallatit aalisariutaasinnaasut maanna killilersorneqanngillat. Sunngiffimmi aalisartunut saarullinnik tunisinissamut akuersissummik peqartunut maleruagassat, qinnuteqarnermut atortunullu atorneqarsinnaasunut tunngasut aamma erseqqissaaffigineqarput.
Naalakkersuisut pingaartippaat nalunaarut pisariinnerusoq aalisarnermut pitsaasunik sinaakkusiisoq qulakkeerneqassasoq. Nalunaarut ulloq 15. juuli 2026 atuutilissaaq.
Paasisaqarnerorusukkuit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik attavigiuk apn@nanoq.gl