Angallatit kalaallinit pigineqarpat angallatillu usitussutsimik allagartaa malillugu 24 meterinit tamakkiisumik angineruppat, angallatip inuttalersornera pillugu immikkut piumasaqaateqarmat eqqumaffigissavat.

Tassani atuupput:

• angallammi aqumiut minnerpaamik 60 %-ii Kalaallit Nunaanni najugaqartutut inuit nalunaarsorsimaffianni nalunaarsorsimassasut, Kalaallit Nunaannilu inuit aqqisa nalunaarsorsimaffianni qaammatisiutit ukiuini kingullerni marlunni nalunaarsorsimassallutik. Inuit pineqartut tamarmik Kalaallit Nunaannut tamakkiisumik akileraartartussaatitaassapput, qaammatisiutillu ukiuini kingullerni marlunni Kalaallit Nunaanni tamakkiisumik akileraartartussaatitaasimassallutik.
• Inuttaasunut ilaasut sinneri tamarmik Kalaallit Nunaanni najugaqartutut inuit nalunaarsorsimaffianni nalunaarsorsimassasut, Kalaallit Nunaannilu inuit aqqisa nalunaarsorsimaffianni qaammatisiutit ukiuini kingullerni marlunni nalunaarsorsimasimassallutik.
  Inuit pineqartut tamarmik Kalaallit Nunaannut tamakkiisumik akileraartartussaatitaassapput, qaammatisiutillu ukiuini kingullerni marlunni Kalaallit Nunaanni tamakkiisumik akileraartartussaatitaasimassallutik.
• Teknikerini sulisut maskinalerinermik, maskinmesteritut allanilu aserfallatsaaliuinermik suliaqartut najugaqarnissamut akileraartarnissamullu piumasaqaateqanngilaq.
• Tamatuma saniatigut inuttaasut allattorsimaffiat tamakkiisuussaaq ilaasullu suugaluartullu tamarmik tassani ilaatigut ilanngunneqassallutik, soorlu: nakkutilliisut, alapernaarsuisut, ilinniartut (aspirantit), sulisut pisariaqartitat sinnerlugit ikisimasut il.il.

Inuit allattorsimaffianni (CPR-imi) angerlarsimaffittut nalunaarsorsimaneq tassaavoq Kalaallit Nunaanni angerlarsimaffik kinaluunniit, Kalaallit Nunaanni inuit allattorsimaffianni nalunaarsorsimasoq. Tassa imaappoq, inuit angerlarsimaffiat ilisimanngitsutut nalunaarsorsimasut, imaluunniit umiarsuaq boksiluunniit kisimi angerlarsimaffittut nalunaarsorsimappat, angerlarsimaffittut nalunaarsorsimanissamut piumasaqaammut naammassinnittutut isigineqassanngillat. Angallatit inuttaasa allattorsimaffiata inuttat pillugit nalunaarummi piumasaqaatinut naammassinninnissaa rederiip akisussaaffigaa, taamatuttaaq inuttat Kalaallit Nunaanni inuit allattorsimaffianni eqqortumik nalunaarsorsimanissaat rederiip akisussaaffigalugu.

Inuttatut ilaasortaq ukiut marluk kingulliit iluanni qaammatit 14-it sinnerlugit angerlarsimaffia ilisimanngitsutut nalunaarsorsimappat, piffissami inuit allattorsimaffianni nalunaarsorsimanerata amigarfiani, piviusumik Kalaallit Nunaanni najugaqarsimanini pillugu uppernarsaat (tro og love-erklæring) atsiorsinnaavaa. Taamatut iliortoqarsinnaavoq inuk eqqortumik nalunaarsorsimappat, imaluunniit rederiip uppernarsarsinnaappagu eqqortumik nalunaarsortinnissaanut suliaq aallartinneqareersoq. Taamatuttaaq inuttatut ilaasortaq eqqungitsumik uppernarsaasiussanngilaq, rederiillu inuttatut ilaasortaq eqqungitsumik uppernarsaateqarnissaanut kaammattussanngilaa. Uppernarsaat uani qallunaatoortaa aasinnaavat uanilu kalaallisut.

Angalanerup aallartinnginnerani inuttaasut allattorsimaffiat GFJK-mut e-mailikkut nassiunneqassaaq, ajornanngippat aallarnermik nalunaaruteqarnermi (aktivmelding) peqatigitillugu. Angallatini interneteqanngitsuni inuttaasut allattorsimaffiata nassiunneqarnissaa rederiip akisussaaffigaa. Allattorsimaffimmi pineqartut aqqi, atorfii (nalunaarummut naapertuuttut), CPR-normui kiisalu najugaqarfittut kommuniisa allannissaat piumasaqaataavoq.

Immersugassaq aasinnaavat uani.

Inuttat pillugit nalunaarummik unioqqutitsisoqartillugu, rederii angallammut akisussaasuusutut tamatuminnga ilisimatinneqassaaq, taamaalillunilu rederii periarfissinneqassalluni inuttaasut allattorsimaffiannik kukkunersiummik nassiussinissaminut, imaluunniit immikkut akuersissummik uppernarsaatinilluunniit takutitsinissaminut. Suliassaq taamatut iliornikkut paasineqarsinnaanngippat, angalanerup naanerani GFJK-p suliassaq unnerluussisussaatitaasunut tunniutissavaa.

Inuttaasut allattorsimaffiannik nakkutilliinermi, piffissami qaammatit 14-it tikillugit nunani allaniikkallarnerit eqqarsaatigineqassanngillat. Tamatuma saniatigut najugaqarnissamut akileraartarnissamullu piumasaqaatinit immikkut akuersissummik (dispensationimik) qinnuteqartoqarsinnaavoq ilinniagaqarneq tunngavigalugu (aalisarnermut attuumassuteqarnera apeqqutaatinnagu), tamanna pissappat inuk aalisarnerup nalaani Kalaallit Nunaanni inuit allattorsimaffianni nalunaarsorsimaffeqarpat, imaluunniit nunani tamalaat imartaanni kalaallit pisassiissutaannik atuinerup nalaani inuttat nalinginnaasut 50 %-ii tikillugit immikkut akuersissuteqartoqarsinnaalluni. Immikkut akuersissutit angalanerup aallartinnginnerani inissereerneqarsimassapput, qinnuteqaatillu Aalisarnermut Piniarnermullu Naalakkersuisoqarfimmut nassiunneqassallutik. apn@nanoq.gl