Namminersorlutik Oqartussat akiliuteqarluni aallaaniarneq aamma aalisarneq pillugu nalunaarutaat nutaaq Naalakkersuisunit akuerineqarpoq. Nalunaarut atuutilissaaq 01-07-2026. Taamaalilluni nalunaarut maannamut atuussimasoq atorunnaassaaq. Nalunaarut nutaaq Kalaallit Nunaanni akiliuteqarluni aallaaniarnermut aalisarnermullu inatsisitigut sinaakkutaassaaq.
Nalunaarummut maannammut atuuttumut sanilliullugu allannguutit pingaarnerpaat tassaapput akiliuteqarluni aallaaniarnermut tunngatillugu, Inatsisartut inatsisaanni 2024-meersumi inatsisitigut tunngavissaq naapertorlugu akiliuteqarluni aallaaniarnermik aaqqissuussisartunut piumasaqaatit nutaat aalajangersarneqarmata. Taakku Kalaallit Nunaanni ukiuni siuliini tallimani aalajangersimasumik najugaqarsimanissaat aamma piniarnermik attuumassutilimmik misilittagaqarnissaat piumasaqaataalerpoq. Tamatuma saniatigut akiliuteqarluni aallaaniarnermik aaqqissuussinerni ilisimasortanik atuinermi piumasaqaatit assingusut atuutilersinneqarput, tassunga ilanngullugit Kalaallit Nunaanni aalajangersimasumik najugaqarnissaq kiisalu piniarnermik attuumassutilimmik misilittagaqarnissaq.
Nunatsinni takornariartunut aalisarusuttunut nutaanik periarfissaqalerpoq. Akiliuteqarluni aalisarnermut web-portali nutaaq aqqutigalugu takornariat aalisarsinnaanermut akuersissutinik ullormut, sapaatip akunneranut imaluunniit qaammammut atuuttunik pisisinnaalerput. Ilutigalugu suliffeqarfiit takornarialerinermik ingerlataqartut sullitatik sinnerlugit akuersissutinik pisisinnaanissaat periarfissaalerpoq. Web-portali nutaaq atorlugu takornarissanut aalisarsinnaanermut akuersissummik pissarsinissaq piuminarnerulissaaq.
Kalaallit Nunaanni akiliuteqarluni aallaaniarnikkut aalisarnikkullu ineriartortitsinissamut periarfissat pitsaasuupput. Taamaattumik inuussutissarsiornermi tassani ingerlatsisut aamma ilisimasortat Kalaallit Nunaanni piniarfiit aalisarfiillu pillugit ilisimasaqarluarnissaat pingaaruteqarpoq, kiisalu siunissami inuussutissarsiornikkut inuiaqatigiinnilu pitsaanerpaamik ineriartortoqarnissaa qulakkiissallugu. Nalunaarutip nutaap saqqummiunneqarnera linkimi uani nassaarisinnaavat: https://nalunaarutit.gl/groenlandsk-lovgivning/2026/selvstyrets-bekendtgoerelse-nr-22-af-10_06_2026?sc_lang=kl-GL
Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut uunga saaffiginnittoqarsinnaavoq: apn@nanoq.gl imaluunniit immikkoortortaqarfimmi pisortaq Amalie Jessen, e-mail: amalie@nanoq.gl