Kapisilinniarneq pillugu nalunaarusiorneq assut pingaaruteqarpoq.
Kalaallit Nunaata nunanik allanik suleqateqarnini aqqutigalugu kapisilinniarnerup aqunneqarneranik patajaatsunik tunngavissiinissaminut qulakkeerinnissalluni imminut pisussaaffilersimavoq. Taamaattumik kapisilinniarsimagaanni, pisaqarsimanngikkaanniluunniit, kapisilinniarneq pillugu nalunaarusiornissaq assut pingaaruteqarpoq. KANUAPNA-mut nalunaarusiorsimasut tamaasa Naalakkersuisoqarfiup qujaffigerusuppai, taakkumi Kalaallit Nunaata kapisilinniarnerup patajaatsumik aqunneqarnissaannut eqqortunik pisaqarsinnaanermut qulakkeerinneqataammata.
NASF (Atlantikup avannaani kapisilinnut aningaasaateqarfik) ukioq 2025-mi aalisartunut tamanut kapisilinniarnerminnik nalunaarusiorsimasunut makitsinermi aningaasanik pinnanneqarsinnaasunik periarfissiivoq. Aningaasat pinnanneqarsinnaasut Kalaallit Nunaanni kapisilinniarnerup nalunaarusiarineqarnerata pitsanngorsarneqarnissaanut tapertaassapput.
Aningaasat pinnanneqarsinnaasut katillugit 95.000 kr.-iupput. Aalisartut 13-it kapisilinniarnerminnik, pisaqarsimanngikkaluartut ilanngullugit, nalunaarusiorsimasut akornanni makitsisoqarpoq. Eqquisut tamarmik nalunaarfigineqareerput, aamma 5.000 kr.-niit 15.000 kr.-illu akornani aningaasanik pinnapput.
Kapisillit uagut nalitsinniinnaanngitsoq piujuartinneqarnissaat kingulissattalu atorluarsinnaanissaat NASF-ip pingaarnertut anguniarpaa aammattaaq kapisilinniarfiup naalaani eqqornerusumik pisaqartoqartarnersoq nakkutigineqarluarnerussammat. Suliniaqatigiiffimmut tunngasut uani itinerusumik atuarsinnaavatit: https://nasf.is/en/about_nasf/
KANUAPNA (Kalaallit Nunaanni Aalisarnermut Piniarnermullu Nakkutilliisoqarfik) piffissami aalisarfiusumi nalunaarusianik 552-nik tigusaqarpoq aamma piffissap aalisarfiusup matoreernerata kingorna ullut 14-it qaangiutereersut nalunaarusianik 123-nik tigusaqarsimalluni. Nalunaarusiat tiguneqartut, kapisilinnik qassinik pisaqartoqarsimaneranik aamma pisaqarsimannginnernik imaqarput. 2025-mi piffissaq aalisarfiusoq pillugu nalunaarusiat procentinngorlugit 68 %-iupput, 2024-mut sanilliullugu 17 %-mik ikileriaateqarlutik.
Aalisartut 2026-mi kapisilinniarnerminnik nalunaarusiornerinut NASF aamma aningaasanik makitsinissamut pinnatassanik tunniusseqqissamaarpoq.
Kapisilik pillugu suleqatigiinneq NASCO-mi (Atlantikup avannaani kapisilinnik piujuartitsinissamut suleqatigiiffik) tunngaveqartillugu ingerlanneqartuuvoq, kapisilik angalaartuartuummat nunat qanimut suleqatigiinnissaannik tamanna piumasaqaateqarluni. Uumasoqassuseq pillugu pisassiissutissanik siunnersuisarnerit ICES-mit (Nunat tamat akornanni imartat ilisimatusarfigineqarnissaat pillugu siunnersuisoqatigiit) suliarineqartarput.
Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl