Inuussutissarsiutiginagu aalisarneq pillugu tamanut tusarniaareernerup kingorna Naalakkersuisut nalunaarut akueraat. Nalunaarut tamanut tusarniaaneq tunngavigalugu Inatsisartullu Aalisarneq pillugu inatsisaata ulloq 16. maj 2024-meersup atuutsinneqalernissaanut qitiulluinnartumik inissisimavoq.
Nalunaarut inuussutissarsiutiginagu aalisartut maleruagassaasa ataatsimuulernissaanik siunertaqarpoq. Aalajangersakkat uumasoqatigiit malillugit nalunaarusiani assigiinngitsuniipput, tamannalu innuttaasut ataqatigiissitsiniarnerminnut ajornartorsiutigisarsimavaat. Nalunaarutissami aalisarnermut maleruagassat nammineq atugassat ataatsimoortinneqassapput, inuussutissarsiutigaluguli aalisarnermut maleruagassat nalunaarutini immikkut ittuni maleruagassaqartinneqaannassallutik.
Maleruagassat atuuttut ataatsimoortinneqarneri
Nalunaarut aalisagaqartigiit eqalunnut, nipisannut, assagiarsunnut, kapisilinnut kiisalu akuersissutinut pisassiissutinullu nalunaarutit pillugit aalajangersakkat atuutereersut ataatsimoortillugit imaqarpoq. Taamaattumik maleruagassanik atuutereersunik annertunerusumik allanngortiterisoqanngilaq.
Nalunaarummi inuussutissarsiutiginagu aalisarnermi uumasoqatigiit sumiiffiinillu matumani allassimasunut atuuppoq:
- Assagiarsuit
- Nipisaat
- Kapisillit
- Kapisillit kuuat
- Saarullik
- Eqaluit
Allannguutit immikkut ittut erseqqissaatillu
Imarisaa ataatsimut allataagaluartoq, nalunaarusiaq paasiuminarsarlugu najukkamilu ingerlatsinermut pitsanngorsaaniarluni ataasiakkaanik erseqqissaanertaqarpoq allannguuteqarlunilu:
- Qassusersornermi sukumiisumik maleruagassat, matumani ningitsinermi ungasissutsit takissusissaanut piumasaqaatit nakkutilliinerlu (§§ 17–19).
- Kommunemit kuunnik eqqissisimatitassanik toqqaasinnaaneq najukkamilu eqqissisimatitsisinnaaneq (§ 22). Kommunenit ukiut tallimakkaarlugit Naalakkersuisoqarfinnut allattorsimaffinnik nassiussisoqartarunnaassaaq.
- Kommuneni pullatinik atuisoqarsinnaanissaa (§ 16, imm. 2).
- Qissattaammik ataatsimik qarsorsalimmik sumiiffinni aalajangersimasuni eqalunniarnermi periarfissatuarineqarnera (§ 13, imm. 6).
- Kapisilinniarnermi inuussutissarsiornermut maleruagassat aallaavigalugit ammaassisarnerup matusisarnerullu tulluarsarnera (§ 8).
- Aalisarnerup matuneqarnerani tamanut nalunaaruteqarnissamut piumasaqaat (§ 9 aamma § 13, imm. 7).
Maleruagassat innuttaasunit takuneqariaannaasut
Nalunaarutissap malitsigisaanik innuttaasut nammineq atugassaminnik aalisartartut maleruagassanik periuseq ataasiinnaq atorlugu atuartariaannanngussaput. Tamanna aalisarnermi pilersaarusiornissaq, nungusaataanngitsumik inatsisinillu atuuttunut naapertuuttumik ingerlatsinissamik kinguneqarnissaa naatsorsuutigineqarpoq.
Nalunaarut juunip aallaqqaattaani 2026 atuutilersinneqassaaq
Siunnersuut Tusarniaavimmi aamma takuneqarsinnaavoq uani:
Paasisaqarnerorusukkuit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik attavigiuk apn@nanoq.gl.