Aalisarnermi saniatigut pisat pillugit nalunaarutip nutartikkap tusarniaanerup ingerlanneqareernerata kingorna Naalakkersuisut akuersissutigaat.
Nalunaarut nutaaq Inatsisartut aalisarneq pillugu inatsisaanik nutaamik atuutsitsilernissamut atatillugu sulinerup ilagaa, aamma saniatigut pisat pillugit maleruagassat paasiuminarnerulersinniarlugit aamma ullumikkumut naleqqussarniarlugit nutarterneqarsimapput. Saniatigut pisat pillugit nalunaarutip siulia 2011-meersuuvoq.
Maleruagassat ataatsimut katersorneqarput
Saniatigut pisat pillugit aalajangersakkat annerusumik takuneqarsinnaasimapput aalisarnermi saniatigut pisat pillugit nalunaarummi. Taamaattoq aamma aalisarnermi saniatigut pisat pillugit maleruagassat nalunaarutini arlalinni siammaqqasimapput – soorlu atorunnaarnikunik aalisakkat assigiinngitsut pillugit nalunaarutini aamma nalunaarummi nutaanngitsumi piujuartitsineq siunertaralugu aalisarnerup teknikikkut iluarsartuussivigineqarnera.
Tamanna maleruagassat ataatsimut isiginiarnerinut ajornakusoortitsisimavoq.
Nalunaarummi nutaami saniatigut pisat pillugit maleruagassat nalunaarummi ataatsimi katersorneqarput. Peqatigisaanillu maleruagassat atuuttut misissorneqarlutillu naleqqussarneqarlutillu, taamaalillutik aamma nutarterneqarlutik.
llannguutit pingaarnerit
Allannguutit pingaarnerit ilaatigut ukuupput:
- Saniatigut pisat ersarinnerusumik nassuiarneqarput. Aalisarnermi pisat, aalisaatinik aalajangersimasunik inatsisit malillugit atoqqusaanngitsunik, pisarineqartut , saniatigut pisatut naatsorsuunneqassapput – aamma aalisartoq aalisakkamut pineqartumut akuersissuteqaraluarpalluunniit.
- Killeqarfiup iluani qassusersornermi ningittagarsornermilu nuutsitsinermut nutaanik sukanganerusunik malittarisassaqalerpoq.
- Maleruagassat nutaat, aalisariutini saniatigut pisat annertussusaat aalisarnerup nalaani aamma tulaassinerup nalaani.
- Aalisakkat ilaat minnerpaaffissaattut aalajangersakkat nutarterneqarsimapput.
Allannguutit allat
Taamatuttaaq arlalinnik minnerusunik allannguuteqarpoq:
- Uumasoqatigiit imaani sunnertiasunut uuttuutaasartut tassungalu killigititaasut piujuartitsineq siunertaralugu aalisarnerup teknikikkut iluarsartuussivigineqarnera pillugu nalunaarutitoqqanit saniatigut pisat pillugit nalunaarummut matumunnga ilanngunneqarput. Tamatuma peqatigisaanik killissarititaasut nalimmassarneqarsimapput.
- Eqalussuit pillugit malittarisassanik ilanngussisoqarpoq.
- Pisanik avalatsitseqqinneq (”Slipping”) pillugu malittarisassanik ilanngussisoqarpoq.
- Uumasoqatigiit suut avalatsinneqaqqittassanersut pillugu ilanngussamik ilanngussisoqarpoq.
- Sinerissap qanittuani pisassiissutitaqanngitsumik aalisagaqatigiit arlallit aalisarneqarsinnaanerat/tunineqarsinnaanerat pillugu maanna ilanngussaqalerpoq.
- Nataarnanik saniatigut pisat pillugit immikkut malittarisassat peerneqarput.
Nalunaarut nutarterneqartoq nalunaarutit.gl-imi atuarneqarsinnaalissaaq,15. oktober 2026-milu atuutilissalluni.
Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl