Aalisarnermut, Piniarnermut, Nunalerinermut Imminullu Pilersornermut Naalakkersuisup Peter Borg-ip Nunatta Kitaani qamutilissorluni tikaagullittassiissutinit 40-t ataatsimoorluni qoorortoorsorluni tikaagullittassanut nuunnissaat aalajangerpaa. Taamaasilluni Kitaani angallatit qamutilillit tikaagullittassaat maanna 81-it sinnerupput kiisalu umiatsiaararsortunut pisassat 98-inngorlutik.
Nuussinissamut ulluliussaq sioqqullugu, (ullussaa kommunit namminneerlutik aalajangissavaat) ataatsimoorluni piniarneq tamarmi inerteqqutaavoq. Kommunit nutaamik agguaasseqqinneq tamanut nalunaarutigereerpassuk piniarneq aatsaat aallarteqqinneqarsinnaavoq.
2025 decemberimi tusagassiorfinnut nalunaarutigineqartutut Kitaani 2026-mi ukiumut tikaagullinnik tunngaviusumik pisassiissutit 164-it pillugit ilisimatitsissuteqartoqarpoq. Tunngaviusumik pisassiissutiniit ataatsimoorluni qoorortoorsorluni piniarnermut tikaagulliit 80-it pisassiissutigineqarput qamutilinnillu tuukkartalinnik piniarnermut 84-t pisassiissutigineqarlutik.
2026 februarimi 2025-mi Kitaani pisarinngitsuukkat nuussat nalunaarutigineqarput, ataatsimoorluni qoorortoorsorluni piniarnermut 20-it qamutilinnillu tuukkartalinnik piniarnermut 62-it.
Tunumi pisassiissutit tamakkerlugit 20-upput, 2025-miillu nuussat quliupput.
Ulloq septembarip 8-anni 2026-mi killiffittut paasissutissat pissarsiarineqartut naapertorlugit Kitaani tikaagulliit 44-t ataatsimoorluni piniarnermi aamma qamutilinnik tuukkartalinnik piniarnermit tikaagulliit 25-t pisarineqarsimapput.
Tunumi tikaagulliit marluk pisarineqarsimapput, tikaagullittassat 26-t sinnerullutik.
Kisitsisit ataaniittut tassaapput qamutilissortuniit umiatsiaararsortunut agguaateqqitat.
Kitaani ataatsimoorluni tikaagullinniarnermi agguaasseqqinneq ima isikkoqarpoq
| Agguaasseqqinnermi nuussat | |
|---|---|
| Avannaata Kommunia | 7 |
| Kommune Qeqertalik | 6 |
| Qeqqata Kommunia | 14 |
| Kommuneqarfik Sermersooq | 7 |
| Kommune Kujalleq | 6 |
| Katillugit | 40 |
Tikaagullittassat agguaasseqqinnermi nuunneqartut amerlassusii 2025-mi agguaasseqqinnermi nuunneqartut amerlaqatigivaat.
Kommunit namminneerlutik tikaagullittassat agguaasseqqinnermi nuunneqartut illoqarfinnut nunaqarfinnulluunniit agguaatissavaat, agguaatereerunikkillu piaarnerpaamik Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut nalunaarutigissavaat.
Sukumiinerusumik paasisaqarusukkaanni allaffimmi pisortaq Amalie A. Jessen amalie@nanoq.gl Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, tlf. 345304