Aasaanerani ukiaaneranilu 2026 tuttunniarnissamut umimmanniarnissamullu pisassat piffissaliussallu Piniarnermut Naalakkersuisumit aalajangerneqarput. Tamanna piffissami 26. maajimiit 24. juuni ilanngullugu susassaqartunut tamanullu tusarniaareernerup kingorna pivoq.
Inuussutissarsiutigalugu piniartut sunngiffimmilu pinialuttartut 1. maaji sioqqullugu akilerneqartumik atuuttumik piniarsinnaanermut allagartaqartut piffissarlu qinnuteqarfik sioqqullugu ukiut qulit kingulliit iluanni Kalaallit Nunaanni sivikinnerpaamik ataavartumillu ukiuni marlunni aalajangersimasumik najugaqarsimasut maannakkut tuttunniarnissamut umimmanniarnissamullu akuersissutinik qinnuteqarnissamut periarfissaqarput. Tamanna www.sullissivik.gl aqqutigalugu imaluunniit sumiiffimmi kommunip allaffia aqqutigalugu pisinnaavoq.
Nalunaarutit atuuttut malillugit inuussutissarsiutigalugu piniartut aamma sunngiffimmi pinialuttartut 2025-mut pisanik nalunaaruteqarsimasut kiisalu qinnuteqartut nutaat piumasaqaatinik allanik naammassinnittut kisimik 2026-mut akuersissutinik pissarsisinnaassapput.
Tuttunniarnissamut umimmanniarnissamullu pisassat piffissaliussallu aasaaneranut ukiaaneranullu 2026-mut atuuttussatut aalajangerneqartut uani takuneqarsinnaapput: Aasaanerani aamma ukiaanerani 2026 tuttunniarnissamut umimmanniarnissamullu piffissaliussat pisassiissutillu
Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut uunga saaffiginnittoqarsinnaavoq: apn@nanoq.gl imaluunniit AC-fuldmægtig Nuka Møller Lund, e-mail: numl@nanoq.gl